جريدة الجمهورية اليوم في حوار خاص مع الفنان التشكيلي عزت شلال من داخل المؤسسة العالمية.
حوار:- ليلى إمام
الفن التشكيلي كما نعرف هو من أجمل الفنون وهو يؤخذ من أرض الواقع ثم يصاغ بتشكيل جديد و يستوحي هذا التشكيل الجديد من فكرة جديدة والتي تعتبر من التجسيد أو التشكيل لشيء معين، ونحن الآن مع واحد من أهم شخصيات الفن التشكيلي.
ممكن نتعرف بحضرتك؟
عزت شلال فنان تشكيلي، ورئيس مجلس إدارة المؤسسة وكنت من ضمن المؤسسين للملتقى وأحنا قائمين على هذا الملتقى .
إزاي جت فكرة المعرض؟
الفكرة إن إحنا عاوزين نتبنى المواهب في سن البراعم في ظل الضغوط أن إحنا نعرفهم للناس ونخليهم يشوفوا ناس أعلى منهم أو يتشاركو مع فنانين كبار زي ما احنا بنقول على أساس إنهم يشوفوا لوحات بتاعتهم ويستفيدوا منها أو يحاولوا يعرفوا الفن بالتدريج بتاعه بيوصل لإيه.
ممكن تكشف لنا أكتر لوحة لفتت نظرك خلال المعرض؟
هي كانت صورة بورتريه مرسوم لراجل كبير في السن مع علامات كبر السن والتجاعيد اللي في وشه اللي بتبين مدى الشقاء اللي شافه في الدنيا فكانت صورة معبرة بطريقة غير محدودة لفتت نظري جامد يعني واكتشفت أنها لفنان لسه مبتدئ ولسه صغير في السن بس اخرجهالنا بطريقة مبتكرة.
ممكن نصيحة للشباب اللي بتبدئ الرسم؟ وخصوصا اللي بيخافوا يظهروا موهبتهم؟
احب أقول إن أي حد عنده موهبة يظهرها لأي حد مهما كان حتى لو موهبة بسيطة أو حتى لو هو مش فنان أوي مفيش حد بيتولد فنان ولا حد بيكبر كدا مع نفسه أنا نفسي كنت فنان على قدي واحدة واحدة طورت نفسي لحد ما كبرت ومفيش حد بيكبر بسهولة فالحمدلله أحنا مش عاوزين إن هما يتعبوا ومش عاوزينهم يشوفوا التعب والجري اللي تعبناه عشان نوصل فخليهم يظهروا للناس ويقولوا أحنا هنا إحنا الجيل القادم.