“رشا العدل” تحيي ذكرى وفاة والدها الفنان “سامي العدل”
كتبت:شروق ياسر محمود
أحيت “رشا العدل” ابنة الفنان الراحل “سامي العدل” ذكرى رحيل والدها و قامت بنشر صورة تجمعها بوالدها عبر حسابها الشخصي “فيسبوك” .
حيث علقت قائلة: ” من إمبارح قاعدة أفكر عايزة أقول لك إيه و لا إيه ناس كتير بتستغرب أنا ليه بسافر كل سنة في السنوية بتاعتك أصلهم ما يعرفوش إن قبل وفاتك ب ۲۲ يوم لميت هدومك و جيت قعدت عندي في بيتي ما يعرفوش إني مش بطيق أقعد في البيت قبل سنويتك ب 3 أسابيع و بتكون حالتي مش مظبوطة بحاول اطلع من المود ده و جو الاكتئاب و اسحل نفسي بأي حاجة ما يعرفوش إن عدى ٦ سنين على وفاتك و شنطة هدومك زي ما هي في الريسبشن زي ما هي ولا عارفة أغير مكانها و لا عارفة أوزع إللي فيها على حد أصلها آخر ذكرياتي معاك ف مش طايقة أقعد في بيتي ما يعرفوش إني من غيرك بجد مكسورة من جوايا و بقي عندي تبلد مشاعر کدة و مش فارق معايا حاجة في الدنيا ما يعرفوش إنك حبي الأعظم و الأكبر و إني من غيرك سراب وحشتني بقى و نفسي أجيلك قوي نفسي يكون كل ده کابوس و اصحى من النوم الاقيك بتكلمني و بتقول لي
وحشتيني ما تيجي يا بت تتغدي معايا و تجيبي البت حبيبة الجبانة وحشتني أو ماصحاش من النوم أصلا و لما افوق افوق على وشك قدامي و ارمي نفسي في أحضانك”.
و الجدير بالذكر أن آخر أعمال الفنان “سامي العدل” مشاركته في مسلسل “بين السرايات” من إخراج سامح عبدالعزيز، وتأليف أحمد عبدالله والذي عرض خلال موسم دراما رمضان عام 2015 .