صلاح عبد الله اثناء مشاركته مع عادل امام بكواليس مسلسل المنسي كتب أسامه اشرف الفنان القدير صلاح عبدالله يروي ما حدث بينه وبين الفنان عادل امام بمسلسل المنسي في لقاء تلفزيوني علي قناه ten وقال صلاح عبدالله وقتها كان لسه اجري حاجة على خفيف اوي .. وكان تصويري في الفيلم كله حوالي اربع خمس ايام بس، اخر يوم تصوير ليا كان خارجي في الشارع والله يرحمه محمد زين المنتج الفني قالي حأديك اجرك كله على بعضه اخر يوم عشان يبقى فيها البركة ..
خلصت تصوير وبدأت اسلم وابوس عشان ماشي .. استاذ عادل قاللي انت رايح فين ؟ قولتله خلصت وماشي .. قاللي طب ما استنى اخلص ونقعد شوية مع بعض وهو كان عنده مكان بيقعد فيه كل يوم .. انا عايز امشي بس اتكسفت ده عادل امام برضه ..
كل شوية ابص لمحمد زين واقوله فين الفلوس، لقيته بيقولي فلوس ايه هو استاذ شريف عرفه ما قالكش ؟ الجملة دي صدمتني .. قولتله هو ماله ؟ قاللي اصل استاذ عادل حجز الفلوس .. قولتله استاذ عادل مين ؟ هو ماله وصوتي بدأ يعلى !!
انت متخيل انا عامل فيلم وما قبضتش وفي بدايتي حياتي ومستنى المبلغ على بعضه وقايل لمراتي حاقبض عشان نعمل حاجات في الشقة .. رتبت حياتي على الفلوس دي .. وفجأة مفيش فلوس !! في الاخر قالي ماليش دعوة روح للاستاذ عادل ..
روحتله بقوله استاذ عادل فين الفلوس ؟ قاللي روح لشريف عرفه .. ايه يا اخواننا في ايه ؟ روحت لشريف قاللي لا اصل استاذ عادل اخد فلوسك ووزعهم على العمال !!! قولتله عمال مين ؟ دول بيكسبوا اكتر مني !!!
طبعا استاذ عادل طلع متفق معاهم وحجز الفلوس وعملوا الحكاية دي كلها عليا عشان مش عايزني امشي وافضل موجود واقعد معاه بعد التصوير قد ايه هوا انسان شهم اوي وجدع ومبدع اوي في تمثيله وسعيد اوي بمعرفته بيه الفنان الكبير عادل امام الزعيم 