رسالة إلى سيدتي الأربعينية
بقلم : دكتور كوثر حسن _ مدرس الإعلام بجامعة عين شمس
“هيا بنا إلى منعطفٕ ذو رونق لا تدركه سوى أربعينيات العمر”
بصي يا ستي الكل
أول ما تدخلي زون الأربعين هتعيشي حالة من المُلك والسلطنة يحسدوكي عليها بنات جنسك سابق ولاحق..
مسألتنيش ليه!!!
ماهو لو انتي كسرتي الأربعين ربيعاً ومازلتِ آنسة بعد …
ده معناه إن البشر الجلياطة الحِشرية السمجة اللي واقفة على باب مصيرك العاطفي والاجتماعي .. هـ يتهتوا ويتبطوا ويفكهم منك ويروحوا يدورولهم على فريسة جديدة عشرينية العمر يحققوا فيها تارجت الـ (هنفرح بيكي امتى!)
ولو كسرتي الأربعين وانتي استغفر الله العظيم (مدام) .. فـ ده معناه إنك متجوزة من ييجي عشر سنين وطالع …
يعني عجنتي صنف الرجالة وخبزتيهم وشكلتيهم وسويتيهم واخدتي في العلاقات دروس السنين..
فـ ما يجيش أيوها راجل في مجرة درب التبانة يتلأمن عليكي ..
ولو كسرتي الأربعين وانتي بعون الله وحوله وقوته (أم) ..
فـ ده معاه انك معاكي عيلين تلاتة خلصتيهم رضاعة وأشط وبامبرز وتطعيمات وبس يا واد بس يا بت … لما بقى عندك مناعة .. وقاعدة دلوقتي بتحتسي النسكافيه بتاعك وسايباهم يعجنوا ف بعض ياكش حد منهم يظرف التاني بوكس يخليه يصنج..
ولو كرستي الأربعين وانتي موظفة… فـ انتي كده أبضاي زمانك في الشغل .. حاطة الموظفين الصغيرين تحت مطرقتك .. والكبار بالمدير بتاعهم في جيبك الصغير القلاب بتاع الجنيه الفضة..
فـ استكنيصي أيتها الأربعينية علشان مافيش حد زيك ..
انتي واحدة عديتي على خوازيق الدنيا ..
واخدتي في العلاقات دكتوراه..
هُدر ورا هُدر لما ضهرك بقى مسلح ..
ودوستي مع البشر لما بقيتي بتجيبي الـ C.V بتاعهم من ريحة البرفان اللي حاطينها.
انتي واحدة مش مِعتمدة .. ومقطعة بطاقتك ..
فـ عيشي الـ life زي ما انتي حباها بقى ..
روحي الچيم ..
جيبي حلويات جيلي من أم أشكال هبلة ..
اسمعي مزيكا أمازيغية…
خدي راحة الراحة ….
وقطعي ودانك قصاد أي كلام …
آه … وأي حد يقول لك أيها حاجة … قولي له انت صح..
وسلامتكن
دكتورة على ما تفرج
اقرأ ايضا: فبراير .. ومن الحب ما فُلِس