فبراير .. ومن الحب ما فُلِس

فبراير ومن الحب ما فُلِس

بقلم : دكتور كوثر حسن

مدرس الإعلام بجامعة عين شمس

شهر فبراير بالنسبة لي حاجتين .. “عيد الحب” .. ومهرجان “هلا فبراير” وهو مهرجان وطني يقام في الكويت سنوياً في فبراير .. والحقيقة إن في قاسم مشترك بين المناسبتين .. ألا وهو (الفلوس) .. واحد بيدخل للبلد فلوس.. والتاني بياخد من رجالة البلد فلوس ..

 

ولأننا مافيش بيننا وبين الدينار عمار .. فأكيد هنكون من فريق الـ متاخد فلوسهم في شهر الفالنتاين.. والكلام هنا رايح ناجية الرجالة المتزوجين منهم والمقبلين..

 

الراجل من دول يبقى بيكح تراب من الغلا .. بس المدام مستنية منه في يوم الفالنتاين شويه اهتمام من اللي ما بيطلبش ده..

ومالو مايضُرش برضو ..

طب نحاول نمسك الدلعدي العصايا من النص!!!

ما هو احنا مش قد قلبان الحكومة..

 

بص يا سيد الناس ..

سواء كنت عايز تاكل عيش في العلاقة لمدة سنة قدام قابلة للتجديد مع شهادة حسن سير وسلوك!!!..

أو كنت عايز تطلع منها بعد تلت تربع المدة مع شهادة حسن سير وسلوك!!

تعمل اللي هنصحك بيه

 

مبدئيا كده ويا ريت ماكونش فاجئتك .. احنا في فبراير ..

يعني ايه فبراير؟؟

يا نهارك “بوز شبرين” وعشروميت كلمة “مافيش” جيالك في السكة

 

أكيد مش تقفيل ميزانية الدولة يعني ولا هو شهر زيادة المرتبات ولا عيد العمال..

ده بعيد عنك وعن السامعين شهر الفالنتاين ..

ايوووون زي مابقولك كده..

 

نركز بقى سوى ونبذل شوية مجهود في العلاقة

علشان المدام تستحق منك سيكة اهتمام من ابو اللي مابيطلبش ده

 

أنا بقى هستجدع معاك واديك شوية أفكار لهدايا الفالنتاين كده بدل ما انت واقف على باب المول مانتاش عارف تجيب ايه بالكام ملطوش اللي حيلتك

 

بص يا سيد الناس..

الستات تفكيرها دلوقتي اختلف في حوار هدايا عيد الحب ده

 

اه والله زي مابقولك

حوار الورد الأحمر بقى والدبدوب الأحمر والهارت الأحمر وجو تحليل الأنيميا ده مابقاش بياكل معاها..

لا لا برضو ما تفتكرش انها زهدت وللا هتوفر لك يا عم .. هي بس طلعت سيكة برة زون مصاصي الدماء اللي بيغطي ع الكوميونتي اليوم ده وتفكيرها بقى عملي..

 

تخيل كده في قلب سواد الأسعار ده لو دخلت ع المدام يوم الفالنتاين بكيلو هياكل فراخ وتبقى وفرت لها طبخة بكره تبقى اتعشت معاها خلاص

أيوه هياكل .. ما هو اللي معاك دلوقتي ما يجيبش فرخة كاملة فـ يادوب كيلو هياكل وزي الفل كده..

وللا لو دخلت عليها بـ تُمن كيلو لانشون ..

لا ده تُمن اللانشون بقى بعشرتاشر جنيه ..

هو يادوبك واحد على ستاشر منه ويبقى ميت فل وستاشر وتبقى وفرت عليها تكلفة لانش بوكس العيل تاني يوم..

 

كلمة بقى في ودن ست الكل..

ياختي خفي على جوزك شويه بقى ماحنا عارفين اللي فيها ..

ده الراجل لو اتعمل له تفتيش ذاتي هيطلعوا من جيوبه كمبيالتين بتوع ال ٢ كيلو بانيه من الشهر اللي فات ..

فـياريت نساعد بعض علشان العلاقة تعدي من منعطف فبراير ده هيلثي بقدر الامكان

 

وسلامتكم..

دكتورة على ما تفرج

 

اقرأ ايضا: الأزمة ليها لازمة