تامر حسني أمنية حياته إن يتعمل ابليكيشن تحت رعاية الدوله و تسمى”المليون أخ”لانقاذ الأطفال

كتبت : أشرقت محمد

نشر الفنان القدير تامر حسني بوست عبر حسابه علي مواقع التواصل الإجتماعي عن إنشاء حملة للتبرع بمبلغ بسيط في صالح الاطفال الذين يعانون من مرض ضمور العضلات.

قال تامر في البوست “يا جماعه مرض ضمور العضلات منتشر جداً في عصرنا ده ربنا يعافي الجميع تخيلوا لو مليون واحد بس من عدد سكان بلدنا العظيمه لو دفع ٣٠ جنيه بس هيساهم في أحياء طفله في لحظه واحده طفله بتتعذب كل لحظه هي و اهلها.

وأكمل كلامه إن اأمنية حياتي والله العظيم دلوقتي ، يتعمل ابليكيشن تحت رعاية الدوله و تسمى (( المليون اخ)) و تبقى على تليفونات الناس اللي هتتبرع مليون واحد هتجيلهم رساله حسب خطورة المرض و نوعه و تكلفته العامه و المطلوب منه و في سيستم يقدر يدخل بنفسه يشوف اسمه و تبرعه راح فين و ان المريض اتعالج خلاص و تجيله رساله شكراً صدقتك احيت نفس بل اسره كامله.

وتابع: أنا كفنان جاهز لأي جهه هتتبنى الفكره دي أني أكون داعم ليها و معلن عنها لو الجهه محتاجه ليا شخصياً أو لصوتي إن شاء الله أنزل ألم التبرعات بنفسي وأخبط على بيت بيت و ده لوجه الله و لخدمة شعبنا و أهالينا المحتاجين.

وأضاف خلال البوست ” اللي هيشترك،،،،،،، مره هيدفع ١٠ جنيه … مره خمسه …. مره ٣٠ اقصى حاجه ٤٠ جنيه لأن حقنة علاج المرض دا ب ٤٠ مليون و دي أغلى حاجه تخيلوا لما ب ٤٠ جنيه بس تنقذ روح بني آدم يعني هتدفع صدقه و هتنقذ روح و انت في بيتك و الصدقه فيها آجر عظيم تحمي نفسك بيها تحمي ولادك و كل اللي بتحبهم و تبقى صدقه جاريه في كل حياتك …. قيمة الصدقه عند ربنا كبيره اوي اوي فوق ما تتخيلوا يا جماعه متتخيلوش بتشيل عننا حاجات صعبه قد آيه لو عرفناها هنبكي فرحاً من رحمة ربنا … يارب حد يسمعني وكدا باذن الله مش هيكون في مريض محتاج
و لو عندنا مشاكل كتير في مجتمعنا آدينا بوحدتنا و بحبنا لبعض بنشيل مشكله منهم”