كتبت: مريم حسن
تنازلت الفنانة “نشوى مصطفى” عن قضيتها ضد المتهمين بالتحرش بابنتها أثناء قيادتها السيارة برفقة زوجها.
حيث أعلنت ذلك في منشور لها عبر حسابها الخاص على موقع “فيسبوك”، موجهة الشكر لقيادات الدولة بعد تدخلهم السريع وضبط المتهمين بالتحرش بابنتها وقالت: ” يوم طويل في نهاية اليوم أحب أقدم كل الشكر والأمتنان لمعالي النائب العام وللفاضل رئيس نيابة الهرم وللفاضل وكيل نيابة الهرم”.
وأضافت قائلة: “بلدنا عظيمة بشرفائها وشكرًا جزيلًا وزارة الداخلية، إحنا مسنودين عليكم والله كتر ألف خيركم، بالمناسبة الطرق الجديدة والكاميرات اللي في كل مكان على الطرق والملصق الإلكتروني، اكتشفت بالبرهان أنهم مش بس علشان يرصدوا مخالفات السرعة، الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل، ومفيش أي فرصة لأى بلطجة، بسبب العظمة اللي الطرق بقت عليها”.
كما تابعت: “الحمد لله تم القبض على العربية باللي كانو فيها فى أقل من أربع ساعات، للأسف كلهم سنهم صغير، الهدف أتحقق أنهم هما وغيرهم عرفوا إن مصر أختلفت وكله متسجل، وأن عندنا عنين صاحية بتحمينا ومحدش فوق القانون، يمكن آخر سطر ده يزعل بعض الناس اللي طلبو مني إني استمر في القضية، حرصًا على أمهات وأسر المتهمين وانهيارهم بأن ولادهم يتسجنوا، أنا وابتغاء مرضاة الله تنازلت عن القضية عملًا بمبدأ العفو عند المقدرة”.
واستكملت حديثها قائلة: “ربنا يهديهم، واللي طلبتوا من أهاليهم وهما بيعتذروا لبنتي أنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هي خمس سنوات طبقًا لقانون التحرش اللي أمر بتعديله سيادة الرئيس حفاظًا على حق بناتنا”.
كما أكدت أنها لم تتقدم بأي محضر وقالت: “حاجة تانية مهمة مكنتش أعرفها، أنا بالمناسبة معملتش محضر، أنا بس كتبت بوست هنا، واللي أتحرك بالنيابة عني كمواطنة مصرية، إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا، وبيهتموا بأي مشكلة يكتبها أي مواطن وليهم أرقام تليفون، نقدر نتواصل معاهم وهما اللي بيقوموا بإخطار النيابات المختصة نيابة عن أى مواطن تعرض لمشكلة”.
وفي نهاية الحديث قالت: “على فكرة أنا أتنازلت عن الجزء اللي يخصنا لكن حق الدولة مش من حقي أتنازل عنه وهما عندهم مخالفات كتير، وتحيا مصر من كل قلبي”.