ليه رمضان فى مصر حاجة تانية وليه السر فى التفاصيل

السر فى التفاصيل
كتبت مريم محمود
رمضان فى مصر حاجة تانية جملة كلنا بنقولها واتنقلت من جيل لـ جيل بالألسنة لحد ما تم تسجيلها كـ أغنية كمان ، بس محدش يعرف امتا اتقالت وليه اتقالت عشان كدا موضوعنا النهاردة عن ليه رمضان فى مصر حاجة تانية وهل فعلًا السر فى التفاصيل زى ما بيقولوا؟ طب لو كدا إيه هى التفاصيل دى؟
خلينا نستعرض أهم الأسباب اللى خلت رمضان فى مصر مختلف أولًا لطيبة أهل مصر وكرمهم: ودا نقدر نستنجه من خلال موائد الرحمن اللى بتبقى مالية الشوارع طول الشهر والعزومات والتجمعات “العائلية وخروجات الأصحاب” والأطباق اللى وتنزل طول الشهر على كل شقة وعلى الجيران ، ثانيًا حب المصريين للفرحة: المصرى بطبعه بيحب أى إحتفالية وبيستنى أى مناسبة للإحتفال بيها فالنسبة له مناسبة زى رمضان شهر كامل؟وبيجى كل سنة؟فلازم يحتفل ويفرح كمان الناس فى الشهر دا يعتبر بيستحرموا يزعلوا ويحسوا إن لأ مينفعش نبقى فى أيام خير وبركة ونضايق ، ثالثًا: العبادات والروحانيات: أيًا كانت شخصية البنى آدم من الداخل فـ هو بيستنى رمضان عشان يأدى العبادات كلها على أتم وجه يعني دا بتعمل ذنوب وبتفوت الصلاة ومحتاج تتوب؟ متقلقش رمضان جاى ودا شهر خير مفيهوش شياطين تحاول توقعك فى الخطأ وهتوب طب انت مواذب على الصلاة؟ بردو الصلاة وتأدية العبادات فى رمضان ليها بهجة تانى فـ أنت بردو مستنيها ، رابعًا:المسلسلات والأعمال الرمضانية: فطرت وسط لمة العيلة والصحاب وأديت فروضك؟ شغلى بقا التليفزيون دا نشوف مين عامل إيه … تعرف إن مصر هى أكتر دولة بتهتم بالسباق الرمضانى للأعمال الفنية لدرجة إن البلاد الأخرى بيبقوا جمهور للأعمال دى خلال الشهر؟ لدرجة إن مفيش عمل بيتصدر خلال الشهر دا إلا ولازم ينجح لإن ببساطة لو معجبكش هيعجب البلد اللى جمبك ، خامسًا:زينة الشوارع: فى شهر رمضان مستحيل تعدى من شارع أيًا كان فى منطقة راقية ولا شعبية إلا ولازم هتلاقى ديكور رمضان فيه ودا لإن الشعب المصرى بيحب النظام بطبعه ولازم كل مناسبة تاخد حقها عنده .
وطبعًا فيه غيرها كتير من الأسباب زى روح الشارع المصرى نفسه ، وإحساسك إنك وسط أهلك وناسك وبلد كلها يعتبر عارفاك “عشان مصر أوضة وصالة زى ما قالوا فى الأمثال زمان” ، عشان كدا إحنا قولنا ولسة بنقول وهنقول رمضان فى مصر حاجة تانية .
اقرأ أيضًا:روج الفنان “كريم عبدالعزيز” لمسلسله الجديد الذي يحمل إسم “الحشاشين” والمقرر عرضه في موسم رمضان 2024. نشر “كريم عبدالعزيز” مجموعة الصور من كواليس مسلسله الجديد “الحشاشين” والمقرر عرضه داخل السباق الرمضاني لموسم 2024