هادم الطفولة وروائي الرعب والتشويق “كيرلس عاطف” في حوار خاص مع جريدة الجمهورية اليوم
أجرت الحوار:- ليلى إمام طه
-من هو كيرلس عاطف؟
طالب كلية هندسة بالجامعة المصرية الروسية، كتبت 5 روايات والحمد لله عملت صدى كويس جدا بين القراء، وصلت قائمة قصيرة في مسابقة إبداع 8 فرع الرواية، ومركز أول في القصة القصيرة مسابقة صلاح هلال الأدبية، وليا مسلسل إذاعي على منصة ibookcast.
– امتى بدأت الكتابة؟
أول ما قرأت رواية في كهوف دراجوسان العدد الأول من سلسلة الأعداد الخاصة لما وراء الطبيعة، لدكتور أحمد خالد توفيق الله يرحمه.. أول ما خلصتها قلت بس لازم اكتب من بعدها.
– بتحب تكتب نوع أي من الروايات؟
بحب اكتب في كل ما يتعلق بالتشويق والإثارة زي البوليسي أو الجريمة، لكن أكثر حاجة بحبها في الكتابة هي الرعب لأني بحس إني بطلع فيها أحداث كويسة مع حبكات محكمة.
– مين بيشجعك لحد ما وصلت لهنا؟
اهلي هم أول وأكبر داعم ليا في الكتابة والنشر والحرص على تقديم كل جديد.
– هل ميولك للكتابة كانت سبب من اسباب دراستك مثلا ولا مجال دراستك بعيد عن المجال دا؟
دراستي ملهاش علاقة بالكتابة، بل أنا حبيت الكتابة لأني بقرأ كتير، قرأت فوق الألف كتاب بين الروايات العربي والانجليش، فده كان حافذ إني أجرب أعمل زي الناس الجميلة اللي بقرألها دول.
-أي أول رواية ليك وأي كان ردود الناس عليها؟
أول رواية ليا هي المقايض، مكنش في ردود أفعال لأنها منجحتش خالص، بس ده كان لازم يحصل لأني كنت متسرع جدا ومتحمس إني اكتب وانشر، فكان اختياري كله غلط من حيث العمل أو الدار.. لكن خرجت من التجربة دي إني ادرس كويس كل خطوة ليا قبل ما اعملها.
– هل واجهت انتقادات خلال مشوارك وأي كان ردك وقتها؟
أغلب الانتقاد إني عملت نجاح كبير وأنا سني صغير، كان رد فعلي إني اركز على شغلي أكتر وانجح أكتر.
– كلمنا عن رواياتك كلها بشكل مختصر؟
أول رواية ليا هي المقايض، تيمة فاوست بتاعت العقد بين البشر والشياطين،
ثم رواية صندوق الموتى، وهي تيمة الأغراض الملعونة،
ثم رواية المتربص، وهي تيمة المرض النفسي،
ثم رواية الشيطان الواحد والعشرون، وهي تيمة السحر والشياطين،
ثم رواية عزبة التفاح الفاسد، وهي تيمة الغموض والأرواح.
– أي أكتر رواية قريبه لقلبك؟
أكتر عمل بحبه هي رواية صندوق الموتى لأنها خلت عندي دافع أن كل حاجة اعملها تكون كويسة ومظبوطة بالشعرة عشان تطلع في أحسن صورة.
– اي سر اسم هادم الطفولة وهل هناك اسم آخر اطلق عليك؟
لأني بكتب نظريات عن الكارتون، والغرض منها النظر لحاجة جميلة وبسيطة زي الكارتون على إنها حاجة مرعبة وراها مؤامرات وكوارث.
– كلمنا عن مسلسلك حكايتي مع scp؟
الscp هي منظمة عالمية، تقريبا كل الناس عارفاها أول على الأقل سمعت عنها كلمة أو اتنين، اغلب الناس اتكلمت من وجهه نظر الناس العادية وهي بتقرأ ملفات المنظمة، لكن أنا قررت اجيب الموضوع من وجهه نظر مختلفة وهي من وجهه نظر المنظمة نفسها، يعني هم لية عملوا كذا وكانوا بيفكروا في أي وهم بيعملوا كذا، طب لو معملوش كذا كان اية اللي هيحصل، وهي دي فكرة المسلسل اننا نتكلم عن المنظمة من كل وجهات النظر.
المسلسل من بطولة اليوتيوبر الجميل أحمد نجم، ومسلسل حصري على منصة ibookcast للكتب الصوتية.
– تحب تقول أي للشباب اللي في بداية موهبتها؟
أول حاجة إنهم يقرأوا كتير جدا جدا، أهم حاجة عشان تبقا كاتب شاطر انك في الأول تكون قارئ اشطر،
بجانب إنه ميتسرعش في قرار ويدرسه كويس قبل أي حاجة.
– هل هناك أعمال تاني قريب تكلمنا عنها؟
إن شاء الله رواية من تأليفي المعرض الجاي وروايتين من ترجمتي وبسعى إنهم يبقوا تلاتة كمان، وإن شاء الله ننزل بالموسم الثاني من حكايتي مع الscp في الهالوين مثلا.