كتبت: مي هشام
كشف الشاعر خالد تاج الدين عن تفاصيل تعاونه مع نانسي عجرم في ألبومها الجديد.
حيث صرح خالد تاج الدين : “ليا كمان أغنية إن شاء الله في ألبوم نانسي، هما غنوتين، الاتنين ألحان وليد سعد، واحدة توزيع هاني يعقوب اللي نزلت “حبك بيقوى “ والتانية إن شاء الله توزيع أحمد إبراهيم. الأغنية كانت مكتوبة لنانسي مخصوص، قعدت أنا ووليد سعد عملنا حاجة لنانسي مع هاني يعقوب، والتانية برضه مكتوبة لنانسي مخصوص “.
وعن ردود الفعل التي حازت عليها “حبك بيقوى” وتداولها علي نطاق واسع منذ طرحها قال: “طبعا مبيبانش من أول يوم، بس الحمد لله في ناس كتير كلمتني، وناس كتير بعتتلي مبروك الأغنية حلوة. هي من نوعية الأغاني اللي بتشتغل في الـ Pubs أكتر، أغاني السهر والرقص، نانسي طول عمرها شاطرة في هذه المنطقة، ولكن أنا أول مرة أتعاون معها في هذا النوع من الأغاني، وكان أول عمل بينا كانت أغنية “حاسة بيك “، كانت أغنية هادية وحب، دي حاجة تانية خالص “.
وصدرت أغنية “حبك بيقوى” على القناة الرسمية لنانسي عجرم بموقع يوتيوب في 27 مايو الجاري، وحققت حتى الآن 1,315,923 مشاهدة، كلمات خالد تاج الدين، وألحان وليد سعد، وتوزيع هاني يعقوب.