كتبت: مريم حسن خليفة
رحلت الفنانة نادية العراقية عن عالمنا عن عمر يناهز 57 عاما منذ أيام بعد إصابتها بكورونا.
ومنذ رحيلها لم يكف أبناء نادية العراقية عن الدعاء لها وتوجيه رسائل مؤثرة تعبر عن حزنهم لفراقها اشتياقهم وحبهم لها، حيث وجهت مي محروس ابنة الراحلة رسالة مؤثرة لها عبر Facebook.
ونشرت مي فيديو يجمعهما وهي تحتضن والدتها وعلقت عليه “يا رب حضنها وحشني وكان بيهون عليا كتير يارب ارحمها وصبرني على فراقها.. خلاص مش هحضنك ولا هشم ريحتك ولا هشوف ضحكتك إلا في ذكريات”.
وأضافت مي “يا ماما كنتي جميلة وحنونة ومبهجة وصاحبة قريبة وهتفضلي دايماً بنفس الصورة في خيالي .. بحبك يا فتوني ووحشتيني أوي يا نور عيني”.
ووجه أدهم محروس نجل الراحلة رسالة مؤثرة إلى والدته بعد رحيلها وقال ” أنا راضي بحكمتك يارب العالمين وراضي بقضائك وأنت عارف إني بحبك وعمري مهزعل منك ابدا و بحمدك انك مقويني عشان إخواتي و ابويا وانا قوي دايما بوجودك ياالله “.
وتابع “بس أنا مكنتش عارف إن الفراق صعب أوي كده!، أنا مش مصدق كل اللي حصل، ومش عارف اعبر عن إحساسي ولا اللي جوايا !، مش مصدق إن ماما كده خلاص !؟، مش مصدق إني مش هشوفها ولاهسمع صوتها ولا هحس بأيديها علي رأسي تاني”.
وأضاف: “يارب دي هي كانت مصدر قوتي في الدنيا، دي كانت الطيبة والضحكة والرزق والفرحة والطبطبة والحنية والثقافة والذوق، دي كانت الدنيا يارب، أنا مش مصدق أن أخر شيله شيلتها لأمي كانت لقبرها! “.
وطالب أدهم من الجميع الدعاء لوالدته الفنانة الراحلة قائلا “يارب ارحمها عشان انت عارف ان قلبها ابيض وبتحبك ارحمها عشان أنت عارف أن عمرها مقصرت مع حد، وعمرها مقصرت معايا بالعكس انا اللي قصرت معاها، بحبك يا ماميتو، هكمل حياتي عشان دي سنه الحياه وعشان وعدتك اني هنجح في حياتي، هتفضلي عايشة في قلبي”.