الأزمة ليها لازمة

الأزمة ليها لازمة

بقلم : دكتور كوثر حسن 

مدرس الإعلام بجامعة عين شمس

 

طبعاً للوهلة الأولى هتروح دماغكم ناحية السكر والرز والزيت وأزمة التموين اللي كلنا بنكح فيها تراب دي ..

 

ولا مانع من إن خيالنا يشطح لفكرة إن الأزمة دي هيكون ليها لازمة لما يحصل حراك اجتماعي وجهود سياسية واقتصادية تعافر في وسط الدولار اللي في العلالي والجنيه المصري اللي في الالالاند .. واللي تمخض عنه ( واسمحوا لي أقول تمخض كده وسط الكلام) .. تمخض عنه ارتفاع سعر البصل..

 

تقولشي مال البصل بالدولار!!

 

بس للأسف مش دي الأزمة اللي جاية اشاور لكم عليها..

أنا اقصد أزمة البني أدم..

 

مؤخراً بقت اهتمامات الناس بتروح أوي ناحية فهم العلاقات وتفسير السلوكيات .. وبدأت تظهر على سطح اللغة ؛ مصطلحات علم نفسوية تم تعريبها بإرادتنا الحرة المستقلة .. زي الـ (توكسيك) .. والـ (ريد فلاجز) .. وغيرها وغيرها من المصطلحات اللي بتحاول تفسر الناس بتعمل في بعضها كده ليه؟

 

وكل المحاولات الإنسانية دي بتصب في مصلحة الوعي ..

 

في العلاقات لازم نكون واعيين كفاية لفكرة (الإدراك الموقفي المتأزم الأسود )..

وده مصطلح لسه مألفاه حالاً وآني طالعة ع السلم .. ولا علاقة له بعلم النفس بس غالباً ده تأثير النور اللي مازال بيقطع ساعة أو ساعتين في اليوم حسب الكاتيجوري بتاعت منطقتك ووجود أو عدم وجود شخصيات ذات حيثية في عمارتك..

 

غايته ..

المقصود من المصطلح ادراكك لحقيقة شخص ما بناءاً على مواقف معينة متأزمة حقيقية اتعرض لها..

 

وهنا هيبقى للأزمة مليون لازمة لأنها هتكشف خبايا الإنسان وتفكيره وسلوكه..

 

وتطبيقاً الكلام ده ما ينفعش نقول على حد إنه هادي غير لما يكون حصل موقف عَـصَـبُه وهو اللي اختار إنه يتحكم في أعصابه ويتعامل بإستراتيچية روستوخ روستوخ يا زكي يا روستوخ..

 

ما ينفعش نقول على حد حنين غير لما نشوفه اتحط في موقف تجبر وسيطرة وهو اللي اختيار إنه يطبطب علينا..

 

أوقات بنشوف ناس معينة طيبين وحلوين علشان ما شوفناهمش في مواقف تطلع الجانب الحقيقي في طبعهم وسلوكهم واتجاهاتهم.

 

مواقف الغضب بتبين الناس على حقيقتها..

مواقف الخلاف بتبين الناس على حقيقتها..

مواقف الخصام بتبين الناس على حقيقتها ..

 

مهم أوي نشوف الناس في معمل الواقع على صفيح ساخن مش بالصورة المستقرة على درجة حرارة الغرفة..

 

وده اللي هيحل في دماغنا لغز السؤال بتاع .

ازاي الناس بتتغير فجأة!!..

 

هم ما اتغيروش ..

هم بس بانوا بانوا بانوا .. على أصلكوا بانوا .. والساهي يبطل سهيانوا…

 

وسلامتكم..

دكتورة على ما تفرج

 

اقرأ ايضا: حي مصر العتيقة