وزارة التضامن:رفض فتاه العمل في نفس دار الأيتام التى تعيش فيها.

بعض الفتيات في الدار كان لهن كفلاء، والبعض لا، “لما الكفيل أو الكفيلة تيجي الدار، الإدارة بترشح لها بنت تشوفها، ويقولوا للبنت في حد عايز يشوفك، وإما توافق الكفيلة، أو يعرضون عليها طفلة أخرى، تمام زي ما بيعملوا مع العريس اللي جاى يتقدم لأي بنت من بنات الدار، حاجة بتوجع جدا، وما حدش من البنات اللي بيكون لها أم أو كفيلة بتتخيل إحساس البنت اللي مالهاش كفيلة”.
بحسب ما رأت شيرين أن مسئولي الدار، عادة ما يرشحون البنت الأصغر للكفيلة، وبعد وقت من تعامل الكفيلة مع بنات الدار، تجد نفسها تميل إلى فتاة أخرى، فتعرض على مسئولي الدار، أن تكفلها هي الأخرى، “شوية شوية الكفيلة بتهمل البنت الأولى، لأنها بتحس إن البنت الثانية دي هي اللي اختارتها بإرادتها وبإحساسها، وهي البنت اللي قالت لها يا ماما بسرعة، وهنا تبدأ البنت الأولى تشعر بالغضب من التفرقة، وقد تصدر عنها تصرفات غير لائقة”.
في عملها الآن كإخصائية اجتماعية في نفس الدار التى تربت فيها، تحاول أن ترسي قاعدة ألا يتكفل الكفيل بأكثر من طفلة، “حصل نفس الموقف قدامي دلوقتي، وقالت الكفيلة للمسئولين عايزة أتكفل ببنت ثانية، فحكيت للمسئولين عن مشاعرنا، وإزاى البنتين بيبصوا لبعض في كل حاجة، كأنهم بيتنافسوا على شخص واحد، الكفيلة عايزة طفلة تقول لها يا ماما وبتيجي الدار تشبع رغبتها وقت ما هي عايزة، مش وقت ما البنت بتكون محتاجة لها، وده اللي نادينا بيه في القانون الجديد، زى ما الكفيل له حق في حياتي، أنا لي حق في حياته، حقوقي كطفل، يفرغ نفسه لي ولو ليوم واحد جوه الدار أو خارجها عشان يكون في جو أسري”

في تلك الليلة تغيرت موازين القوى في دار الطفلة شيرين وأخواتها، في تلك الليلة أصبح لهن صوت، وأصبح بإمكانهن أن يستنجدن في أى وقت بمديرية التضامن الاجتماعي، في تلك الليلة عرفن كيف يتصلن بخط نجدة الطفل، وتخلصت فتيات الدار كلها من المشرفة التى كانوا يطلقون عليها “الساحرة الشريرة”، كل هذا بفضل الطفلة “شيرين عبد الله إبراهيم”.
“كنت في المرحلة الإعدادية، وكنا في مناسبة تابعة لمديرية التضامن الاجتماعي، وبيحضرها المحافظ، وسأل أستاذ من المديرية على بنت من اخواتنا، فسكتت الإخصائية، وقالوا له إنها تعبانة، لكن أنا وبنت ثانية قلنا له: هي متعاقبة ومضروبة ومحبوسة، وتأكد من كلامنا، وأعطاني رقمه، وقال لي لو أى حاجة من دي حصلت تاني كلميني على طول”.
في مرة أخرى لاحظت شيرين أن بعضا من أخواتها دائما نائمات أو يشتكين من دوخة، فشكت أن يكون في الأمر مكروه، فاتصلت بالأستاذ علاء من المديرية وحكت له، وبالفعل تم التفتيش على الدار وعرفوا أن بعض الأمهات أعطوا حبوبا منومة للبنات، “وقتها حسيت إني أقدر أعمل حاجة، قبلها ماحدش كان يقدر يشتكي ولا نعرف إن من حقنا نشتكي، لا البنات اللي أكبر منى ولا اللي أصغر، وبدأ يتعمل لنا حساب واختفى الضرب”.