جريدة الجمهورية اليوم
جريدة - شبابية - مستقلة

تأييد فني واسع لإعلان يوسف الشريف رفضه “المشاهد الساخنة”

0 33

تقرير: منى حسن

“أرفض المشاهد الساخنة ” جملة قالها الفنان القدير يوسف الشريف أثناء حديث مع الإعلامي رامي رضوان مؤخرا، أحدثت جدلا واسعا بين منتقدين ومؤيدين.

وكانت مواقع نشرت تصريحات يوسف الشريف، وقالت أنه اشترط “عدم ملامسة النساء في أعماله”، ويشترط كتابة هذا البند في عقود أعماله، وهذا ما نفاه “الشريف” – عبر تدوينة – كتب فيها: “مش عارف إزاي كلمة (المشاهد الساخنة) اتحولت لـ(ملامسة النساء).. عموماً لازم نفترض حسن النية، وطبعاً المشهد ده أصلاً ملوش أي علاقة بالكلام ده.. ده مشهد عادي جداً وتخيل إن كل الدوشة دي بسبب تصريح من حساب مزور.. كذبوا الكذبة وصدقوها”.

وفي الوقت الذي هاجم فيه بعض المتابعين على مواقع التواصل الاجتماعي الفنان يوسف الشريف، وقاموا بنشر مقاطع لأفلام قديمة، وقالوا إنه يدعي “الفضيلة”..أصر قطاع عريض من الفنانين مؤازرة الفنان معبرين عن تأييدهم له وكل ما قاله.

ونشر الفنان كريم فهمي، صورة ليوسف الشريف – عبر حسابه الرسمي بموقع (إنسجرام) – وعلق عليها: “الراجل دا أنا بحبه وبحترمه في العموم مخلص ومجتهد وحر في رأيه ويحترم”.

في حين كتب الفنان الشاب هشام ماجد – عبر حسابه بموقع التواصل الاجتماعي (فيسبوك) – “فيه بعض الناس سواء شغالين في المجال الفني أو صحفيين أو ناس عادية استغلوا الكلام اللي قاله يوسف الشريف في برنامجه مع رامي رضوان وابتدوا يهاجموه وقاموا ناشرين حاجات لأفلام قديمة عملها عشان يثبتوا أنه كان بيعمل الحاجات دي عادي وأنه يعني كدة بيدعي الفضيلة وكدة…الفصيلة دي من البني آدمين هما تاني أسوأ حاجة بعد الكورونا… كل الاحترام ل يوسف الشريف … فنان راقي ومحترم بيتعب علي شغله وبيحترم جمهوره”.

أضاف “كل الاحترام لأي حد متفق أو مختلف مع كلامه بس باحترام… وكل واحد ليه الحرية في أفكاره طالما بيحترم اللي حوليه ومبيأذيش حد… مش عجبك كلامه تقدر ما تتفرجش علي أعماله أو تقدر متشغلوش…إنما تطلع تقطع وتشوه فيه بحجة إنك المحامي المدافع عن حق الفن وحرية الإبداع تبقي شخص ناقص… بس كدة… كلمتين كانوا حزئني… اتفضلوا استلموني معاه”.

في حين نشر الفنان محمد أنور – عبر (فيس بوك) – صورة للفنان يوسف الشريف، وكتب “إيه كل الهري والكلام الفاضي اللي حصل عشان الراجل ده قال إنه عنده مبدأ معين هو إنه ضد المشاهد الساخنة أو الأحضان والبوس والكلام ده، لإنه ببساطة بيخاف ربنا ومش عاوز يغضبه، وهو شغال بالمبدأ بقاله أكتر من عشر سنين وناجح بيه وربنا كارمه من وسع كمان، وإنه هو مش ضد اللي بيعمل عكس كدة ولا شايف نفسه أكتر احتراما من حد”.

وأضاف محمد أنور: “فجأه كل الناس شايفاه رجعي ومتخلف ومش فنان، كل ده علشان موضوع الراجل طرحه بكل احترام وقال إنه فيه ممثلين كتير زيه أصلا مش بيحبو يعملوا ده أو ندموا أصلا على أعمال هما قدموها في البداية وبعدين شافوا إنه ماينفعش إنه يعمل كدة تانى”، ثم أكد أنور أنه يتفق تماماً مع كل ما ذكره الفنان يوسف الشريف مؤكداً أنه مؤمن بكل ما قاله.

بينما كتبت اَيتن تغريدة – عبر (تويتر) – “بصراحة متضايقتش خالص من إنترفيو يوسف الشريف وبصراحة مش فاهمة الدوشة دي كلها ليه؟..أنت حر ما لم تضر، بس كده، وما أعتقدش أنه ضر حد بقناعاته، شابوه يا عم”.

أما الفنان أشرف زكي نقيب المهن التمثيلية فقال – خلال تصريحات تلفزيونية – إنه ليس متابعًا لمواقع التواصل الاجتماعي بشكلٍ جيد، ولم يطلع على تفاصيل الأزمة المُثارة على مدار الساعات القليلة الماضية حول أحد الممثلين، قائلًا: “مش متابع.. وأرفض التعليق على هذه الأزمة.. مقدرش أقيم حاجة لم أراها”.

وأضاف أنه يجب التفريق بين المبادئ الشخصية، وفنان يتوقف عن ملامسة النساء في ظل أزمة كورونا، مطالبًا بعدم الانجراف وراء قضية وصفها بـ”الوهمية”.. وتابع “ده فنان له رأي خاص به فقط، وليس قاعدة عامة.. وكل واحد له رأيه ويحترم.. وأنا معرفش مين الممثل ده ولا عاوز أعرفه”.

تعليقات
Loading...